ಭಗವದ್ಗೀತಾ ಆರತಿ

ನಮ್ಮ ಧರ್ಮದ ಯಾವುದಾದರೂ ಕೃತಿ ಅತಿ ಪ್ರಸಿದ್ಧವಾಗಿದೆ ಎಂದರೆ ಅದು ಭಗವದ್ಗೀತೆ. ಬಹಳ ಕ್ಲಿಷ್ಟವಲ್ಲದ ಭಾಷೆಯಲ್ಲಿ ಜನ-ಸಾಮಾನ್ಯರೂ ಅರಿಯಬಲ್ಲಾದ ತತ್ವಜ್ಞಾನವನ್ನು ತಿಳಿಸಿಹೇಳಿ ಮನುಜರ ಮನಸ್ಸನ್ನು ಪ್ರಶಾಂತಗೊಳಿಸುವ ಕೃತಿ ಇದು.

ಆದರೆ ಒಂದು ಸಮಸ್ಯೆಯೆಂದರೆ ಭಗವದ್ಗೀತೆ ಇರುವದು ಸಂಸ್ಖೃತದಲ್ಲಿ - ಅದೂ ಪದ್ಯ ರೂಪದಲ್ಲಿ - ಸ್ವಲ್ಪ ಕಷ್ಟ.

ನಮ್ಮ ತಾಯಿ ಅವರ ಸೋದರತ್ತೆಯಿಂದ ಕಲಿತ ಗೀತೆಯ ಕನ್ನಡಾನುವಾದ - ಸಂಕ್ಷಿಪ್ತ ಅನುವಾದ - ಅದೂ ಆರತಿಯ ಪದ್ಯ ರೂಪದಲ್ಲಿರುವ ಅನುವಾದ ಮೊನ್ನೆ ಕೇಳಿದೆ. ಬಹಳ ಇಷ್ಟವಾಯಿತು.

ನಿಮಗೆ ಹೇಗೆನಿಸುತ್ತದೆ ನೋಡಿ.

--------------------------------------------------------------------- 

ಧನ್ಯನಾದೆನು ಕೇಳಿ ನಿನ್ನಿಂದ | ಮನದೊಳಗೆ ನಿಂದ|

ಮೋಹವಡಗಿತು ಹರಿಯೆ ಭರದಿಂದ||

ಜ್ಞಾನದಿಂ ಭೂತಗಳ ಸೃಷ್ಟಿ | ಪ್ರಳಯ ನಿನ್ನಿಂದೆಂಬುದರಿತೆನು|

ವಿಶ್ವರೂಪವ ನಿನ್ನದನು| ತೋರೆಂದ ಪಾರ್ಥಗೆ ತೋರಿದಾತನಿ||

 ಗಾರತಿಯ ನಾನೆತ್ತಿ ಬೇಡುವೆನು|

ಶ್ರೀ ಹರಿಯೆ ವರವನು| ನೀಡು ನೀ ನಿನಗಿಷ್ಟವಾದುದನು||೧||

 

ನೋಡಲಾಗದು ನರನೆ ನಿನ್ನಿಂದ| ಈ ಕಣ್ಣಿನಿಂದ|

ನನ್ನ ರೂಪವ ನಿನ್ನ ಮುನ್ನಿಂದ||

ದಿವ್ಯ ನೇತ್ರವ ಕೊಡುವೆ ನೀ| ನೋಡೆನ್ನನೆಂದವಗಿತ್ತು ತೋರುವ|

ವಿಶ್ವರೂಪವ ಧರಿಸಿ ನಾನಾ ರೂಪದಿಂ ಮುನ್ನಿಂದ ಮಾಧವ||

ಗಾರತಿಯ ನಾನೆತ್ತಿ ಬೇಡುವೆನು||೨||

 

ನೋಡು ನೀನೆಂದೆನುತ ಗೋವಿಂದ | ಬಹುರೂಪದಿಂದ|

ವಿಶ್ವರೂಪವ ತಾಳುತಿಂತೆಂದ||

ನೋಡು ವಿಧವಿಧ ನಾಮರೂಪದ|ಲೆನ್ನ ದೇಹದ ಸಕಲ ಭಾಗಗ|

ಳಲ್ಲಿ ತೋರ್ಪ ಚರಾಚರಾತ್ಮಕ| ಜಗವನೆಂದ ಮಹೇಂದ್ರವಂದಿತ||

ಗಾರತಿಯ ನಾನೆತ್ತಿ ಬೇಡುವೆನು||೩|| 

 

ಬಹುವಿಧಾಕೃತಿ ವರ್ಣಕರ್ಣಗಳು | ಬಾಹೂರು ಮುಖಗಳು|

ನೇತ್ರ ನಖ ರೋಮಾಂಘ್ರಿ ಕೇಶಗಳು||

ವಿಧವಿಧಾಯುಧ ಭೂಷಣಾಂಬರ| ಪುಷ್ಪ ಗಂಧಾದಿಗಳ ಧರಿಸಿದ|

ಮೀರಿ ಗಗನವ ಸರ್ವತೋಮುಖ|ವಾಗಿ ತೋರುವ ಧೀರ ಯದುವರ||

ಗಾರತಿಯ ನಾನೆತ್ತಿ ಬೇಡುವೆನು||೪|| 

 

ಸೂರ್ಯಕೋಟಿಗಳುದಯಿಸಿದ ತೆರದಿ| ತೋರ್ಪವಗೆ ಭರದಿ |

ನೋಡಲಚ್ಚರಿಯಾಗಿ ಮೂ ಜಗದಿ||

ಅಕ್ಷಿ ಕುಕ್ಷಿ ಮುಖೋರು ಪಾದಗ| ಳಳತೆಯಿಲ್ಲದ ವಿಶ್ವರೂಪವ|

ನೋಡಿ ಬುಡ ನಡು ಕೊನೆಯ ಕಾಣದೆ |

ನಿಂತ ನರನನು ನೋಳ್ಪ ನರಹರಿ||

ಗಾರತಿಯ ನಾನೆತ್ತಿ ಬೇಡುವೆನು||೫|| 

 

ಶಿರದೊಳಿಟ್ಟ ಕಿರೀಟಗಳ ಸಾಲು | ಹೆಗಲೊಳಗೆ ಶಾಲು |

ಚಕ್ರ ಗದೆಗಳ ತೊಟ್ಟ ಕೈತೋಳು||

ಉರಿವ ಕಿಚ್ಚಿನ ತೆರದಲಕ್ಷಿಯ ಕುಕ್ಕುವಂತಹ ಕಾಂತಿಯುತ|

ಸೂರ್ಯಾಗ್ನಿ ದೀಪ್ತಿಯ ದೇಹವನು | ಧರಿಸೀಕ್ಷಿಸುವ ಸರ್ವಾತ್ಮನಿಗೆ ನಾ||

ಆರತಿಯ ನಾನೆತ್ತಿ ಬೇಡುವೆನು||೬||  

 

ದೇವತಾದಿಗಳೆಲ್ಲ ದೇಹದಲಿ| ಅಂಗಾಂಗಗಳಲಿ|

ತೋರುತಿವೆ ಬಹು ರೂಪವಾಗಿಲ್ಲಿ|

ಭೇದವಾಗಿಹ ಜಗವನೆಲ್ಲವ|ನಿಟ್ಟು ತನ್ನೊಳು ತೋರಿದಾತಗೆ |

ನರನು ಕೈಮುಗಿದೆಂದ ಮಾತನು ಕೇಳುವಾತನಿಗಜನ ತಾತನಿ|

ಗಾರತಿಯ ನಾನೆತ್ತಿ ಬೇಡುವೆನು||೭||  

 

ಕೋರೆದಾಡೆಗಳಿಂದ ಭೀಕರವು| ಹರಿ ನಿನ್ನ ಮುಖವು| 

ನೋಡಲಸದಳ ಬಹಳವಾಗಿಹವು||

ಸೇರುತಿರುವನು ನಿನ್ನ ಮುಖವನು| ವೀರ ಕುರುಪತಿ ತನ್ನ ಬಲವನು|

ಕರ್ಣ ಭೀಷ್ಮ ದ್ರೋಣರನು ಸೇರೆಂದ ಪಾರ್ಥಗೆ ತೋರಿದಾತನಿ||

 ಗಾರತಿಯ ನಾನೆತ್ತಿ ಬೇಡುವೆನು||೮||  

 

ನದಿಯು ಜಲಧಿಯ ಸೇರುವಾ ತೆರದಿ| ತೋರ್ಪವಗೆ ಭರದಿ| 

ಸೇರಿ ಶಿರ ಮುಂದಾಗಿ ಬಹು ಭರದಿ||

ದಂತಯಂತ್ರದಿ ಚೂರ್ಣವಾಗುವ | ಕರ್ಣಭೀಷ್ಮ ದ್ರೋಣ ಕೌರವ| 

ರವನಿಪಾಲರ ತನ್ನ ಯೋಧರ ನೋಡಿ ನಡುಗುವ ನರನ ನೋಳ್ಪವ||

ಗಾರತಿಯ ನಾನೆತ್ತಿ ಬೇಡುವೆನು||೯||

 

ಮುಕ್ಕುವಂದದಿ ಜಗವ ಜವದಿಂದ |ನೀ ಮುಖಗಳಿಂದ | 

ಘೋರ ರೂಪದಿ ದೇವ ಮುನ್ನಿಂದ||

ತೇಜ ನಿನ್ನದು ಮೂರು ಜಗವನು| ಮೀರಿಹುದು ನೀನರಹು ಯಾರೆಂ|

ಬುದನು ತಿಳಿಯುವನೆಂದು ನಮಿಸಿದ ನರನ ನೋಡುತ ನುಡಿಯುವಾತನಿ||

ಗಾರತಿಯ ನಾನೆತ್ತಿ ಬೇಡುವೆನು||೧೦||

 

ಯುದ್ಧ ಮಾಡಲು ಸಿದ್ಧನಾಗೀಗ| ಮೂಜಗವ ಬೇಗ||

ನಾಶ ಮಾಡಲು ಕಾಲನಿಹೆನೀಗ||

ಹೊರತು ನಿನ್ನನು ಸುತ್ತು ನಿಂತಿಹ| ನೃಪರು ಸತ್ತಿಹರೆಂದು ತಿಳಿ ನೀ| 

ವಿಜಯ ವಿಶ್ವವನಾಳಿ ಬಾಳು ನಿಮಿತ್ತ ನೀನಿದಕೆಂದ ಕೃಷ್ಣನಿ||

ಗಾರತಿಯ ನಾನೆತ್ತಿ ಬೇಡುವೆನು||೧೧||

 

ಆಡಿದಾ ನುಡಿ ಕೇಳಿ ನಡುಗುತ್ತಾ | ಕೈ ಮುಗಿದು ಮತ್ತಾ|

ಪಾರ್ಥನುತಿಸಿದನಾಗ ನುಡಿಯುತ್ತ||

ಸತ್ಯವೈ ಸುಂದರವು ನಿನ್ನಯ| ಕೀರ್ತಿ ಜಗಕಾನಂದದಾಯಕ|

ಸಿದ್ಧನುತ ಸಕಲಾರ್ತಿಹರ ಸಲಹೆಂದ ಪಾರ್ಥನ ಪಾಲಿಸಿದ ಹರಿ||

ಗಾರತಿಯ ನಾನೆತ್ತಿ ಬೇಡುವೆನು||೧೨||

 

 ಎಂದು ನೋಡದ ನಿನ್ನದೀ ರೂಪ| ನೋಡೆನಗೆ ತಾಪ|

ಹರುಷವಾಯಿತು ಮನಕೆ ಬಹುರೂಪ||

ಶಾಂತವಾಗಿಹ ನಾಲ್ಕು ತೋಳಿನ| ಶಂಖ ಚಕ್ರ ಗದಾಬ್ಜಗಳ ಧರಿ |

ಸಿರುವ ಮೊದಲಿನ ರೂಪವನು ತೋರೆಂದ ಪಾರ್ಥಗೆ ತೋರಿದಾತನಿ||

ಗಾರತಿಯ ನಾನೆತ್ತಿ ಬೇಡುವೆನು||೧೩||

 

ತಂದೆ ನೀನೆ ಜಗಕೆ ಗೋವಿಂದ| ವಸುದೇವ ಕಂದಾ|

 ಹಿರಿಯನ್ಯರನರಿಯೆ ನಿನ್ನಿಂದ||

ತಿಳಿಯಲುತ್ತಮ ನೀನೆ ತಿಳಿವವ| ವಿಶ್ವವನು ತುಂಬಿರುವೆ ಸಿದ್ಧರಿ|

ಗುತ್ತಮಾಸ್ಪದನೆಂದ ಪಾರ್ಥನ ರಕ್ಷಿಸಲು ಮುನ್ನಿಂದ ಮುರಹರ||

ಗಾರತಿಯ ನಾನೆತ್ತಿ ಬೇಡುವೆನು||೧೪||

 

ವಾಯು ವರುಣ ಶಶಾಂಕ ರವಿ ನೀನೆ| ನಿಋ್ಋತಿಯು ನೀನೆ|

ಹರಿಹರಾಜ ಮಹೇಂದ್ರ ಯಮ ನೀನೆ||

ಇಲ್ಲದೇ ನೀನಿಲ್ಲ ವಿಶ್ವವಿ|ದೆಲ್ಲವೆಲ್ಲೆಡೆಗೆಂದು ವಂದಿಸಿ|

ಹಿಂದೆ ಮುಂದೆಯು ಕೆಳಗೆ ಮೇಲೆಂದೆನದೆ ನಮಿಸುವ ನರನ ನೋಳ್ಪವ||

ಗಾರತಿಯ ನಾನೆತ್ತಿ ಬೇಡುವೆನು||೧೫||

ದೇವದೇವರಿಗಾದಿ ಮೂಜಗಕೆ| ಮಹದಾದಿ ವಿಶ್ವಕೆ|

ಹೇತುವಾಗಿಹೆ ಜಗದೊಳೆಲ್ಲದಕೆ||

ಹೊರತು ನನ್ನಿಂದಿಲ್ಲ ಸಕಲವು| ನೂಲಿನಲಿ ಪೋಣಿಸಿದ ಮಣಿಗಳ|

ತೆರದಿ ಭೂತಗಳಲ್ಲಿ ನಾ ಗಂಧಾದಿ ಗುಣನೆಂದಾ ಮುಕುಂದನಿ||

ಗಾರತಿಯ ನಾನೆತ್ತಿ ಬೇಡುವೆನು||೧೬||

 

ಸೌಮ್ಯ ರೂಪವ ಹೊಂದಿ ನಗಧರನು| ನರನೆಂದ ಮಾತನು |

ಕೇಳಿ ತಾ ದಯೆಯಿಂದ ಮಾಧವನು||

ನೋಡಲಮರರು ಬಯಸುವೀ| ರೂಪವನು ಭಾವಿಸುತೆನಗೆ ಕರ್ಮಗಳ|

ರ್ಪಿಸೆನ್ನೊಳು ಸೇರಿ ಸುಖಿ ನೀನಾಗು ನರನೆಂದಾ ಮುಕುಂದನಿ||

ಗಾರತಿಯ ನಾನೆತ್ತಿ ಬೇಡುವೆನು||೧೭||

 

ಒಲಿದು ತೋರಿದೆ ವಿಶ್ವರೂಪವನು | ನಿನಗೀಗಲಿದನು|

ಯೋಗಿ ಯಾದವ ಬೇಗ ತಿಳಿವುದನು||

ಯಾಗ ಧ್ಯಾನಾಧ್ಯಯನ ದಾನ| ತಪಕ್ರಿಯಾದಿಗಳಿಂದಲನ್ಯರು|

ತಿಳಿಯಲಾರದ ರೂಪವನು ತೋರಿದೆನು ಬೆದರದಿರೆಂದ ಮುರಹರ|

ಗಾರತಿಯ ನಾನೆತ್ತಿ ಬೇಡುವೆನು| |

ಶ್ರೀ ಹರಿಯೇ ವರವನು ನೀಡು ನೀ ನಿನಗಿಷ್ಟವಾದುದನು||೧೮||

 

---------------------------- 

 

ಹಾಡು ನಮ್ಮ ತಾಯಿ ಮತ್ತು ನನ್ನ ತಂಗಿಯರ ಧ್ವನಿಯಲ್ಲಿ :

 

ಹಿಂದಿನ ಪುಟ